9月2日，周二。恒生指数升136.15，收21042.46；成交493亿元。9月期指升287点，收21160点，呢个系熊市二期典型走势(似好非好、似淡非淡)；沪深三百指数跌1.03％，收2285.41。
上交所及深交所至8月30日止，有一千六百一十九间上市公司半年纯利5533.03亿元，较去年同期上升16.04%，中期加权平均每股收益23.3分，升幅好细。如再计算两税合并增加咗上半年企业纯利，睇到内地企业纯利已由去年上半年高增长期，进入咗今年上半年低增长期。
日本人面对问题摆埋一边
美国对冲基金到今年7月止平均蚀咗3.43％，仍跑赢标普五百指数(同期回落12.65％)，但跑输畀指数(同期升1.05％)。呢个1.9万亿美元市值嘅对冲基金行业，今年首两季新流入资金只得300亿美元(去年同期1190亿美元)；由于今年较难借钱作对冲用途，因此今年难有出色表现。因为基金经理主要嘅收入嚟自分红。因此今年佢地收入大减，唔少最一流分析员及Trader可能因此离开所属嘅基金。相信9月结后，对冲基金经理出现重新执位情况。
今年愈嚟愈多投资者放弃基础分析(即价值投资法)。自信贷压碎(credit crunch)出现后，大大挑战成个金融行业嘅运作模式！例如较高商品价格及较低GDP增长率，改变咗投资者对证券价值嘅睇法。例如航空及制造股，纷纷跌穿过去被认为嘅合理价；通用汽车由30美元跌至10美元，跌幅超过66％；花旗银行股价喺一个月内波幅可以达到70％；房利美及房贷美亦打破人们对政府支持企业(GSE)嘅睇法。对冲基金虽然今年上半年大部分蚀钱，但已渐成投资市场嘅主流思想，即同时睇好及睇淡唔同行业股份，投资策略引用对冲概念。
字串1
家吓七十二岁、上任唔够一年嘅日本首相福田康夫，本周一宣布辞职，因今年第二季日本GDP收缩2.4％，上周五佢提出刺激经济方案被认为「老饼」唔获国会支持，其职位或将由今年六十七岁、一向以能言善辩出名嘅麻生太郎继任；佢计划增加政府开支去刺激经济，暂时唔理会国家巨大负债。日本政府今年总负债系GDP 148％(美国政府系62％)。虽然日圆利率咁低，日本政府每年财务负担仍占去税收四分一。日本银行面对0.5厘利率，以后减唔减息对经济分别唔大。加上7月份CPI上升2.4％，日本政府可以话系无晒计。
一个国家经济前景好多时同佢地嘅民族性格有关。日本人喜欢钻研，好似花道及茶道等可见到日本人嘅一丝不茍精神，每一细节代代相传达到最精致境界。呢个系日本产品无论汽车到电子产品，质量皆能达致世界一流水平嘅理由；呢个系日本经济能从战后废墟中崛起嘅理由。
1971年我老曹曾跟一位日本人学习阴阳烛走势。佢系日本国家商品公司港区副主席，嗰时已发现佢服务紧嗰间公司财政方面有问题，佢自己亦知道，我老曹问佢点解唔即刻将佢纠正？佢话畀我老曹知，日本人认为问题可以随时间过去而消失；积极去纠正问题反而引起公司员工之间不和。换言之，日本人当面对问题时常用摆埋一边嘅方法而唔去解决，除非到咗非解决不可嘅地步为止。1974年呢间期货公司宣布破产，嗰位日本人亦回国去矣。日本人呢种性格令佢地嘅经济自1990年至今仲系咁，因佢地相信随时间过去问题会自动消失，除非无法忍受先改变。
字串1
最近南韩情况都几令人担心。KOSPI指数由去年11月1日2085点回落到近日1400点，跌幅32％。汇价已好接近2004年11月3日1116南韩圜兑1美元(当时外资开始大量涌入)，一旦失守可以加速南韩圜回落。
今天泰铢继续下跌，泰国股市跌至十九个月内低位，主因系政局动荡。今年海外投资者净沽出31亿美元泰国股票；不过，8月份CPI升幅已下降至6.4％(7月9.2％)，情况冇表面睇咁差。
您的位置: